Greatest Hits av Alice Cooper

Alice Cooper's Greatest Hits er eit samlealbum av Alice Cooper frå 1974. Det inneheld hitsinglar med songar frå det tredje albumet (Love It to Death) til det siste albumet deira med den originale besetninga (Muscle of Love).

Plateomslaget var laga av Ernie Cefalu og har på framsida ein illustrasjon av Drew Struzan av bandmedlemmane føre ein garasje frå 1930-åra, i lag med filmstjerner frå den tida som Humphrey Bogart, Clark Gable, Edward G. Robinson, Jean Harlow, Peter Lorre og Groucho Marx.

Songane på samlinga vart miksa på ny av Jack Richardson og ein ny miks av «I'm Eighteen» vart gjeven ut på singel i USA. Årsaka til at songane vart miksa på ny var kanskje for å kunne sei at det var «nye» versjonar av songane, sidan det ikkje var nye songar som kunne takast med på albumet då bandet hadde ein pause på denne tida.

Samlinga vart utvida i 2001 då Rhino gav ut Mascara & Monsters: The Best of Alice Cooper, som inneheld dei originale singelversjonane av songane i tillegg til fleire songar frå tida etter 1974.